【打機定睇戲?】《Quantum Break》第一身玩後感(無劇透)

唔少巴打都對《Quantum Break》有興趣,可惜PC版又唔生性,令到唔少無Xbox One嘅巴打都對呢款遊戲卻步,希治閣上星期就喺直播時完成咗遊戲,不如就等我將自己玩後感同大家分享下。

穿梭時空 SOD X射擊?


遊戲玩法主要同大家之前玩過、同屬於Remedy嘅《Alan Wake》及《Max Payne》有少少似,不過今次就加入左時間控制元素。遊戲中玩家可以加速、使用時空炸彈、護罩等等,雖然「能力上」同其他遊戲大同少異,但用唔同元素同故事包裝都有一份新鮮感,特別係大家都鍾意嘅SOD 「Stopu系列」。隨住遊戲進度,玩家亦會學到愈來愈多的技能,大家可以感受到主角在戰鬥及處事上的成長,雖然成隻Game 整體遊戲時間唔算長,只有六、七個鐘左右(筆者邊做直播方邊玩都只係用左七個半鐘),但係整個遊戲循序漸進,絕對唔似其他射擊作品,只係由頭打到尾。
quantum-break-will

quantum-break-pc-announcement-screenshot-008
故事細緻 真人片加動畫完美配合


遊戲開賣之前主sell 遊戲故事,除咗係以時空穿梭為主題之外,另一點吸引嘅就係以真人拍攝嘅故事短片。遊戲與《Alan wake》一樣,美劇味重,每一章之間更有一個稱為「分岔點」嘅選擇位,比玩家可以自行決定遊戲及故事推進方向,其後就會有一集40分鐘左右嘅真人短劇,令玩家可以了解到遊戲中唔同角色對事件嘅睇法,從而豐富整個故事。遊戲中有大量收集物品,每件收集物品都會補完故事及角色嘅關係,令玩家更易了解到整件「事件」嘅來龍去脈。整體而言,《Quantum Break》劇力迫人,而且故事節奏快,絕不拖泥帶水,即使係「時空交錯」呢類複雜邏輯亦能以深入淺出方式講明一切,只要大家有留意主角對話,就可以清楚明白到整個世界觀同故事,即使同朋友一齊玩,旁觀者亦唔會悶。

quantum-break-live-action-trailer-ed
quantum-break-screenshot-03-Aidan-Gillen-1024x576


玩後點評:遊戲成份太少?到底係遊戲定電影?

如上文提到,玩左7個鐘多少少就爆左機,不過希治閣及觀眾巴打們都有同樣疑問,就係「大家過去7個鐘到底係爆左隻Game,定係睇左一套夾左少少遊戲嘅電影?」。老實講,遊戲中短劇的確吸引,但作為遊戲,比重就似乎有少少過量。玩家真正落手玩嘅情節同時間,與睇片嘅時候幾乎一樣,即係話Game time 7個鐘,真正落手嘅時間其實都係得3個鐘多D,而且仲有唔少係交代劇情,要求玩家喺地圖上面行走嘅章節,所以如果你問《Quantum Break》係唔係一款值得買嘅「遊戲」,我會答你「唔係」,因為個人認為佢定位更似《Beyond two soul》/《Heavy Rain》呢種互動電影。相反以互動電影為基準的話,《Quantum Break》首先有重量級Cast,配合Remedy呢間一直著重劇情嘅開發公司,令整套電影欣賞價值上升,即使係用「時空穿梭」呢類容易喺故事同世界觀上有bug嘅題材上亦拿捏得相當好;每個角色都有自己行動嘅動機與目的,大家在彼此間嘅矛盾亦令觀眾睇得緊張無比,即使係奸角亦有住自己嘅故事同苦衷,最後亦令大家覺得其實在整件事上無分對錯,只係大家立場同睇法有所不同,不過講到呢度都係時候停一停,廢事一陣口多講左結局。

如果巴打本身都諗住買《Quantum Break》黎玩,希望有一款緊張刺激嘅殺戮,我都係勸你留番啖氣;不過如果你係想搵隻Game Kill下time,等黎緊幾日假有D野做,順便煲吓劇,我就覺得唔駛再考慮,《Quantum Break》真係買得過。

上一篇0001364645
同名小說授權改編手機遊戲《少年四大名捕》預計 5 月上線
下一篇0001364482
強調連招的動作手機遊戲《聖騎士之歌》開放 Android 版本下載
資深遊戲玩家,主編網上遊戲資訊節目《遊戲情報科》深受巴打歡迎,期望身體力行,証明比全香港睇打機真係搵到食。
評論

評論

LEAVE A REPLY