【欄極圈】一個亞視中佬心底話

近來有一位中年危機嘅朋友,早幾日無啦啦打嚟叫我上佢屋企試玩新機,原來佢啱啱同女朋友分手。

 

 

「唔緊要啦,男人事業為重。」

 

 

「事咩業呀?無做啦,原本4月1號先last day,但係人算不如天算,提早收皮。」無錯!你估中,佢係做亞視嘅。

 

 

正所謂前世做錯事,今世做亞視。都係講返打機,點知...原來呢位亞記中佬口中所講嘅「新機」,竟然係Wii !(我明係唔應該咁mean,亞記人慢幾拍都係好正常,好!我忍!)

 

 

「呢部好野嚟架,我想買好耐,咁啱公司拖糧,我同事等錢駛先賤價賣俾我。好彩我醒目平時有儲錢,你知啦我公司成日無啦啦無糧出,梗係要有啲準備。」你地睇唔到佢講果陣,雙眼發光,真心覺得自己好撚醒果個樣,真係想兜巴打醒佢。

 

 

就喺呢個佢暗爽嘅moment,佢條女偏偏係呢個時候send咗個voice message俾中佬:

 

 

「我同你分手,係因為你成世都係二奶命,打機打二奶機,叫你打Division唔打,走去打Sleeping Dog!唔玩PAD,係要玩神魔,連返工都返二奶台!話你呢又話做開有感情呀、同事好有人情味...係囉!就係因為你同埋你啲同事係度圍爐取暖,所以你公司咪唔出糧囉!(下刪三千字)」

 

 

可憐嘅中佬眼濕濕,睇嚟佢個人都幾感情豐富

 

 

「佢唔明亞視就係我屋企,想當年畢業,出面風大雨大,好彩有個叔父介紹入亞記,唔係都唔知做咩好。雖然啲人成日笑亞記,但係其實做二奶都幾好。男人都係愛個二奶多過大婆架啦!你諗下,啲人話無線一年出勁多垃圾劇,我哋一年都唔出一套,幾環保呀!仲有呀,唔係我哋咁少廣告,金像獎直播邊有得播咁足本!」

 

 

好喇,咁究竟點解條女要離開中佬呢?

 

 

原來條女一直有個老公,中佬一路都不過係「二公」,唔怪得佢連返工都可以做「義公」。

 

 

「我唔會怨我條女,我永遠都會等佢。」

 

 

聽完口亞記嘅員生存哲學,真係尼彩都猜唔透,唔怪得啲人話亞視會永遠都存在!Between,金像獎係要多謝亞視嘅。

 

 


 

 

12834784_10154022973941967_1276604751_n-150x150

 

 

作者:谷小小

 

廿X歲廢青港女  一句撻著港男:「女人無乳溝就谷小小都有,男人唔夠長呀?認命啦!

上一篇0001344146
三國逗趣新作《天天逗群英》台港澳代理權確定 事前登錄今日上線
下一篇ICON
《MT每日遊報》SunShine做遊戲代言,你想唔想玩?
評論

評論

LEAVE A REPLY