【MT試玩】《Gear Of War4》重燃Fans們的對戰熱情

【MT試玩】《Gear Of War4》重燃Fans們的對戰熱情

 

《Gears Of war4》終於今日喺推出,作為Xbox 重頭力作,相信Fans們都期待咗好耐。故事以第三集後25年為世界背景,今次遊戲開發都講到明,由於故事世界中人類以極大資源去重建星球,所以遊戲今集嘅武器都「承傳」住過去幾集嘅鎗械,所以如果你期待今集遊戲可以比到全新感覺又或者世界大家,可能你會有少少失望;但如果你期待嘅係GOW式熱血、短兵相接式對決,今次《GOW4》就可以比你搵返嗰股熱血喇。

故事方面由於筆者未完成整個遊戲,所以今次都唔喺度作詳細分析同講解(再者我自己本身對GOW 唔算好有愛同研究,所以都唔敢扮專家)。主要我自己玩GOW 其實都係玩佢嘅多人模式同埋Horde 3.0。多人模式方面今次加入咗兩個今集新登場嘅武器Dropshot 同Buzzkill,聽個名大家都已經大約估到支鎗係咩料,令到以往好多「膠著」嘅戰局都會有新打法。

除咗新武器,遊戲仲有好多新嘅終結技能,點玩法你可以睇返上面嘅影片,但係夠多血,夠爽快;當你成班對住個死剩種,你體內嘅獸人基因就會完全覺醒。所以玩落嘅時候,一拎起手掣,就有返以前玩《GOW》舊作嘅感覺。咁當然畫質提昇就係今次不得不提嘅重點之一。多人模式嘅穩定60FPS 的確會令到玩家更緊張,即刻角色動作快,走位密都唔會有頭暈感,不過緊張嘅感覺真係會令玩家好易攰,玩咗幾個鐘之後都不得不認老。

Horde3.0 我諗大家之前都已經玩緊,針對過去嘅「50波」加入Class之後,令玩家更可以分工合作,對抗獸人時候就更可以提升大家之間生存機率。大家玩開多人game都知,一個人累炒真係可以影響到成team 人情緒,當每個人都有獨立工作崗位之後就更可以體驗到。

筆者自己係一個射擊遊戲愛好者,而且當年亦係因為《GOW》而落坑,如果你問我點睇,我自己點都有少少偏心。遊戲緊張、節奏快、亦都非常血腥,戰略同發洩之間亦拎到應有平衡,爽快感充足之餘亦非常耐玩。不過遊戲玩法其實都傾向Oldschool同hardcore,直接D講遊戲非常Fans向,而且亦唔係咁易上到手。故事mode遊戲方式方面,繼續係GOW式,行路傾計,之後硬橋硬馬打怪無限LOOP,對遊戲玩家好有要求,希望得到驚喜嘅玩家可能未必滿足,但如果你只求一隻爽Game,其實唔多需要作多餘考慮,直接買之後再推Friend 落坑啦。

上一篇
「挑戰還將繼續」、NEXON回到初心的新作發表會
下一篇Wonderful-Clash-Royale-Wallpaper
《部落衝突:皇室戰爭》未來更新消息流出  有傳將加入《爐石》亂鬥模式到遊戲?
資深遊戲玩家,主編網上遊戲資訊節目《遊戲情報科》深受巴打歡迎,期望身體力行,証明比全香港睇打機真係搵到食。
評論

評論

LEAVE A REPLY